Këshilli Kombëtar Shqiptar (KKSH) ka hapur një thirrje publike për aplikim të projekteve, në kuadër të programit të financuar nga Qeveria e Republikës së Kosovës.

Qëllimi i kësaj nisme është të fuqizojë jetën kulturore, arsimore dhe mediatike shqiptare në Luginën e Preshevës, përmes mbështetjes konkrete financiare për organizata, shkolla sportive dhe iniciativa të pavarura.

Sipas njoftimit të publikuar nga KKSH, thirrja përfshin katër fusha kryesore të veprimit:

1️⃣ Gjuha shqipe dhe simbolet kombëtare

2️⃣ Arti, kultura dhe trashëgimia kulturore shqiptare

3️⃣ Informimi dhe mediat në gjuhën shqipe

4️⃣ Mbështetje për projektet sportive dhe organizatat aktive në komunitet

Këto fusha përbëjnë shtyllat kryesore të identitetit dhe zhvillimit të shoqërisë shqiptare në Luginë, ndërsa synimi është që përmes këtij fondi të shpërndahet mbështetje e drejtë dhe transparente, bazuar në kriteret profesionale dhe meritën e çdo aplikanti.

Përzgjedhja e projekteve, siç është paralajmëruar, do të bëhet nga një ekip profesionistësh të pavarur, duke përjashtuar çdo ndikim politik apo personal.

Në fokus do të jetë kualiteti i ideve, ndikimi real në komunitet dhe angazhimi i organizatave shqiptare, pa dallime.

💬 “Në këtë mënyrë po i hapet dera energjisë që ekziston në Luginë. Qëllimi është t’u jepet hapësirë ideve që përmirësojnë jetën e qytetarëve tanë, forcojnë identitetin dhe krijojnë mundësi të reja për të rinjtë,” thuhet ndër të tjera në komunikimin e KKSH-së.

Sot, në cilësinë e Kryetarit të Këshillit Kombëtar Shqiptar (KKSH), Enkel Rexhepi iu drejtua Organizatës Turistike në Bujanoc me një kërkesë të rëndësishme: në afat sa më të shkurtër kohor të evitohet lëshimi i papërgjegjshëm në konstruksionin e ndriçuar metalik të vendosur në Sheshin e Bujanocit.

Në kërkesën e tij, kërkohej që mbishkrimi në gjuhën shqipe të shkruhej siç duhet – “MIRËSEVINI NË BUJANOC”. Ky lëshim është i papranueshëm dhe kërkohet që të korrigjohet sa më shpejt.

Kërkesa u bë duke u bazuar në Ligjin për Këshillat Nacionale të Pakicave Kombëtare, që i njeh Këshillit Kombëtar Shqiptar autorizimet për përdorimin zyrtar të gjuhës shqipe dhe shkrimit shqip. Sipas regjistrimit të fundit të popullsisë, shqiptarët në komunën e Bujanocit përbëjnë 62% të popullsisë, dhe si pasojë, gjuha shqipe është gjuhë zyrtare në këtë komunë.

Në momentin që kërkesa iu dorëzua drejtorit të Agjencisë Turistike, z. Adem Salihi, ajo u refuzua me arsyetimin se mbishkrimi nuk ishte edhe në gjuhën serbe. Më pas, drejtorit iu kërkua që kërkesa të përkthehet në gjuhën serbe, duke theksuar se gjuha zyrtare në Serbi është serbishtja.

Përpara se të shprehet kështu, drejtori i Agjencisë Turistike duhet të ketë parasysh se në komunat multietnike, ku përfaqësuesit e pakicave janë mbi 15% të popullsisë, gjuha e pakicave është gjithashtu gjuhë zyrtare. Në rastin konkret, gjuha shqipe është gjuhë zyrtare në Bujanoc dhe duhet të përdoret nga të gjitha institucionet dhe organizatat.

Prandaj, Enkel Rexhepi kërkon që Drejtori i Agjencisë Turistike të respektojë gjuhën shqipe dhe të sigurojë përdorimin e saj si gjuhë zyrtare në çdo dokument dhe mbishkrim, ashtu siç është e drejta e shqiptarëve të Luginës së Preshevës.

#RespektoGjuhaShqipe #KKSH #Bujanoc

Enkel Rexhepi nga radhët e Partisë për Veprim Demokratik (PVD) është zgjedhur Kryetar i Këshillit Kombëtar Shqiptar (KKSH) në Serbi. Zgjedhja e tij u realizua gjatë seancës së VII-të të këtij institucioni, mbajtur të premten.

Rexhepi do të zëvendësojë Nevzad Lutfiun, i cili ka kryer këtë detyrë për një periudhë dyvjeçare, siç parashikohet nga marrëveshja e koalicionit të vitit 2022. Ky rotacion është pjesë e një marrëveshjeje mes disa subjekteve politike shqiptare në Luginën e Preshevës, përfshirë PVD-në dhe LPD-në, dhe do të sigurojë përmbushjen e mandatit katërvjeçar të KKSH-së.

Enkel Rexhepi do të udhëhojë KKSH-në për dy vitet e ardhshme, ndërsa nënkryetare do të jetë Mimoza Klaiqi Kadriu nga LPD-ja. Ky emërim është një hap tjetër në forcimin e bashkëpunimit politik mes subjekteve shqiptare të Luginës së Preshevës.

Për zgjedhjen e Rexhepit, ka reaguar edhe deputeti i vetëm shqiptar në Kuvendin e Serbisë, Shaip Kamberi, njëherësh kryetar i PVD-së. Ai ka uruar Rexhepin për marrjen e kësaj detyre dhe ka theksuar rëndësinë e vazhdimësisë në luftën politike për të drejtat e shqiptarëve, si dhe thellimin e raporteve me Qeverinë e Kosovës dhe Shqipërisë.

“Enkeli po merr një detyrë të rëndësishme për të vazhduar luftën për të drejtat e shqiptarëve dhe për të intensifikuar bashkëpunimin ndërkombëtar. Rrethanat politike janë të vështira, por nuk ka tërheqje nga lufta për të drejtat”, ka shkruar Kamberi në rrjetet sociale.

Ai gjithashtu ka falënderuar Nevzad Lutfiun për angazhimin e tij në krye të KKSH-së, duke theksuar kontributin e tij për çështjet e komunitetit shqiptar në Serbi.

Ky emërim shënon një hap të rëndësishëm për forcimin e institucioneve dhe mbrojtjen e interesave të shqiptarëve në Serbi.